சொந்தமாக தொழில் தொடங்க ஆசையா? ஹாலோபிளாக் தயாரிப்பு - ஒரு லாபகரமான வாய்ப்பு.

 ஹாலோபிளாக் கற்கள்

ஹாலோபிளாக் கற்கள்

 முன்னுரை:

 இந்தியாவில் கட்டுமானத்துறை மிக வேகமாக வளர்ந்து வரும் நிலையில், பாரம்பரிய செங்கற்களுக்கு மாற்றாகப் புதிய கட்டுமானப் பொருட்கள் அதிக அளவில் பயன்படுத்தப்பட்டு வருகின்றன. இதில் ஹாலோபிளாக் கற்கள் (Hollow Blocks)  முக்கியப் பங்கு வங்கிகின்றன. இவை சிமென்ட், ஜல்லி மற்றும் மணல் ஆகியவற்றின் சரியான கலவையால் உருவாக்கப்படும். உள்ளீடற்ற அமைப்பை கொண்ட ஒரு வகையான கட்டுமான கற்கள். கட்டுமானச் செலவைக் குறைப்பதுடன், கட்டிடங்களை விரைவாகவும், எளிதாகவும் கட்டி முடிக்க உதவுகின்றன. மேலும், இவற்றின் உள்ளீடற்ற அமைப்பு வெப்பத்தையும், ஒளியையும் திறம்படக் கட்டுப்படுத்துவதால், வீடுகளுக்குள் இதமான சூழ்நிலையை உருவாக்கி, மின்சாரச் செலவையும் குறைக்கின்றன.

     இந்த சிறப்பம்சம் காரணமாக, ஹாலோபிளாக் கற்களுக்கான தேவை நகர்ப்புறங்களிலும், கிராமப்புறங்களிலும் தொடர்ந்து அதிகரித்து வருகிறது. இந்த அதிகரித்துவரும் தேவையைப் பூர்த்தி செய்ய, ஹாலோபிளாக் கற்கள் தயாரிப்பு தொழில் ஒரு லாபகரமான சிறு தொழில் வாய்ப்பாக உருவெடுத்துள்ளது. குறைந்த முதலீடு, எளிமையான உற்பத்தி முறை, சந்தையில் நிலையான தேவை ஆகியவை இந்தத் தொழிலை புதிய தொழில் முனைவோருக்கு ஒரு சிறந்த தேர்வாக அமைகின்றன.

     ஹாலோபிளாக் கற்கள் தயாரித்தல் ஒரு சிறந்த சிறு தொழிலாகும். இதன் உற்பத்தி செலவு குறைவு மற்றும் சந்தையில் நல்ல தேவை உள்ளது. இந்தத் தொழிலைத் தொடங்குவதற்குத் தேவையான உபகரணங்கள், மூலப்பொருட்கள், செய்முறை, விற்பனை மற்றும் அரசு அனுமதி குறித்து விரிவாக பார்ப்போம்.

➊. ஹாலோபிளாக் கற்கள் தயாரித்தல் - ஒரு அறிமுகம்

     ஹாலோபிளாக் கற்கள் என்பவை சிமென்ட், ஜல்லி, மற்றும் மணல் (அல்லது கிரஷர் மண்) ஆகியவற்றை கொண்டு தயாரிக்கப்படும் கட்டுமானப் பொருட்கள். இவை பாரம்பரிய செங்கற்களை விட இலகுவானவை, மளிவானவை, மற்றும் விரைவாகக் கட்டிடங்களை எழுப்ப உதவுகின்றன. இவற்றின் உள்ளீடற்ற அமைப்பு (Hollow Structure) வெப்பக்காப்பு மற்றும் ஒலி காப்புத் திறனை அதிகரிக்க உதவுகிறது.

➋. தேவையான உபகரணங்கள் (Machinery & Equipment):

     ஹாலோபிளாக் கற்கள் தயாரிக்கத் தேவையான உபகரணங்கள், உற்பத்தித் திறனைப் பொறுத்து மாறுபடும். ஆரம்ப நிலையில், நீங்கள் சிறிய அளவிலான இயந்திரங்களுடன் தொடங்கலாம்.

     2.1 கலவை இயந்திரம் (Concrete Mixer Machine):

 ● சிமென்ட், ஜல்லி, மணல் போன்றவற்றை சரியான விகிதத்தில் கலந்து, சீரான கான்கிரீட் கலவையை உருவாக்க இது அவசியம்.

 ● கொள்ளளவைப் பொறுத்து, 100 லிட்டர் முதல் 500 லிட்டர் வரை கிடைக்கும். 

 ● கைகளால் கலக்கும் முறை ஆரம்பத்தில் சாத்தியமானாலும், அதிக உற்பத்திக்காக இயந்திரம் அவசியம்.

 2.2 ஹாலோபிளாக் தயாரிப்பு இயந்திரம் (Hollow Block Making Machine):

 ● இதுதான் மிக முக்கியமான இயந்திரம். இதில் பல வகைகள் உள்ளன: 

 ● கைமுறை இயந்திரம் (Manual/Hand Operated Machine): குறைந்த முதலீடு, குறைவான உற்பத்தி ஆரம்பிப்பவர்களுக்கு ஏற்றது.

 ● அதிர்வு இயந்திரம் (Vibrating machine): கலவையை அச்சுக்குள் வைத்து அதிர்வு மூலம் இருக்கமாக்கும். ஓரளவுக்கு நல்ல உற்பத்தி திறன் கொண்டது.

 ● ஹைட்ராலிக் பிரஸ் இயந்திரம் (Hydraulic Press Machine): அதிக அழுத்தம் கொடுத்து கற்களை உருவாக்கும். மிக உயர்ந்த உற்பத்தித்திறன், சிறந்த தரமான கற்கள். பெரும்பாலும் செமி-ஆட்டோமேட்டிக் அல்லது ஆட்டோமேட்டிக் ரகத்தில் வரும்.

 ● மொபைல் ஹாலோபிளாக் இயந்திரம் (Mobile Hollow Block machine): இது நகரும் தன்மை கொண்டது. கற்களை ஒரு இடத்தில் இருந்து மற்றொரு இடத்திற்கு நகர்த்தாமல், கற்கள் தயாரிக்கப்படும் இடத்திலேயே வைத்து உலர்த்த முடியும்.

 2.3 சக்கர வண்டி/டிராலி (Wheelbarrows/ Trolleys):

 ● கலவையை மிக்ஸரில் இருந்து தயாரிப்பு இயந்திரத்திற்கு அல்லது தயாரிக்கப்பட்ட கற்களை காயவைக்கும் இடத்திற்கு நகர்த்த.

 2.4 அச்சுகள் (Moulds):

 ● வெவ்வேறு அளவுகளிலும், வடிவங்களிலும் ஹாலோபிளாக் கற்கள் தயாரிக்க வெவ்வேறு அச்சுகள் தேவைப்படும் (எ.கா: 4 இன்ச், 6 இன்ச், 8 இன்ச், 10 இன்ச்). சில இயந்திரங்களுடன் அச்சுகள் சேர்ந்தே வரும். அல்லது தனியாக வாங்க வேண்டும்.

 2.5 தண்ணீர் தொட்டி / போர்வெல் (Water Tank / Bore well):

 ● கலவை தயாரிக்கவும், கற்களை பக்குவப்படுத்தவும் (Curing) தண்ணீர் அவசியம்.

 2.6 சட்டி, மண்வெட்டி (Panda, Shovels):

 ● கலவையை அளந்து எடுக்கவும், மற்ற வேலைகளுக்கும்.

 2.7 பிளாஸ்டிக் ஷீட்டுகள் (Plastic Sheets):

 ● தயாரிக்கப்பட்ட கற்களை மழை, வெயில் போன்ற வெளிபுறச் சூழ்நிலைகளில் இருந்து பாதுகாக்க.

➌. தேவையான மூலப்பொருட்கள் (Raw Materials):

 3.1 சிமென்ட்  (Cement):

 ● சாதாரண போர்ட்லேண்ட் சிமென்ட் (OPC - Ordinary Portland Cement) பொதுவாகப் பயன்படுத்தப்படுகிறது. இதன் தரம் கற்களின் வலிமையை நேரடியாக பாதுகாக்கும். நல்ல தரமான சிமென்ட் பயன்படுத்துவது அவசியம்.

 ● விரைவாக காய்வதற்கு சில வகை சிமென்ட்கள் உள்ளன, அது உற்பத்தி வேகத்தை அதிகரிக்கும்.

 3.2 ஜல்லி (Coarse Aggregate / Crushed Stone):

 ● கால் இன்ச் (6மிமீ) அளவுள்ள ஜல்லி கற்கள் பொதுவாகப் பயன்படுத்தப்படுகின்றன. இவை கற்களுக்கு வலிமையை கொடுக்கின்றன.

 ● தூசு, மண் இல்லாத சுத்தமான ஜல்லி தேவை.

 3.3 கிரஷர் மண் / எம்-சண்ட் / ஆற்று மணல் (Crusher sant / M-sand River sand):

 ● இது கற்களின் அடர்த்தி மற்றும் மேற்பரப்பை மேம்படுத்த உதவுகிறது.

 ● கிரஷர் மண் பொதுவாக நல்ல தரமானதாகவும், ஆற்று மணலுக்கு ஒரு சிறந்த மாற்றாகவும் உள்ளது. ஆற்று மணல் கிடைத்தால், அதுவும் பயன்படுத்தலாம். ஆனால் தூசு, களிமண் கலக்காமல் பார்த்துக் கொள்ள வேண்டும். 

 ● எம்-சண்ட் மற்றொரு சிறந்த மாற்று, இது ஜல்லி கற்கள் உடைத்து தயாரிக்கப்படுவதால் தூசு கலக்காமல் இருக்கும்.

 3.4 தண்ணீர் (Water):

 ● குடிப்பதற்கு உகந்த சுத்தமான தண்ணீர் கலவைக்கு பயன்படுத்தப்படவேண்டும். உவர்ப்பு தன்மை, சேறு, எண்ணெய் கலந்த தண்ணீர் பயன்படுத்தக் கூடாது.

➍. செய்முறை (Manufacturing Process):

 4.1 மூலப்பொருட்களை அளவிடுதல் (Proportioning):

 ● கற்களின் வலிமை மற்றும் தரத்திற்கு இது மிக முக்கியம். பொதுவாகப் பயன்படுத்தப்படும் விகிதம்:

 ● சிமென்ட்: 1 பங்கு (உதாரணமாக, 1 சட்டி அல்லது 50 கிலோ மூட்டை)

 ● ஜல்லி: 4-5 பங்கு (அதாவது, 4-5 சட்டி)

 ● கிரஷர் மண் எம்/சாண்ட்: 2-3 பங்கு (அதாவது, 2-3 சட்டி)

 ● இந்த விகிதங்கள் இயந்திரத்தின் வகை மற்றும் விரும்பிய கற்களின் வலிமையைப் பொறுத்து மாறுபடும். தொழில் அனுபவமுள்ளவர்களிடம் கலந்து ஆலோசிப்பது நல்லது.

 4.2 கலவை தயாரித்தல் (Mixing):

 ● கலவை இயந்திரத்தில் முதலில் ஜல்லி மற்றும் மணல் ஆகியவற்றைச் சேர்த்து சிறிது நேரம் கலக்கவும்.

 ● பின்னர் சிமென்டைச் சேர்த்து நன்கு கலக்கவும்.

 ● இறுதியாக, தேவையான அளவு தண்ணீரை சிறிது சிறிதாக சேர்த்து, கான்கிரீட் கலவை சமமாக, சீராக இருக்குமாறு கலக்கவும். கலவை மிகவும் நீர்த்துப் போகாமலும், மிகவும் உலர்ந்து போகாமலும் இருக்க வேண்டும். (சரியான பதம்: கலவையை கைகளில் எடுத்து பிசைந்தால், ஒன்றாக ஒட்டி கொள்ள வேண்டும். ஆனால் தண்ணீர் கசியக்கூடாது).

 4.3 கற்களை உருவாக்குதல் (Block Moulding):

 ● தயாரிக்கப்பட்ட கான்கிரீட் கலவையை சக்கர வண்டியில்/டிராலியில் ஏற்றி, ஹாலோபிளாக் தயாரிப்பு இயந்திரத்திற்கு கொண்டு செல்லவும்

 ● இயந்திரத்தின் அச்சுக்குள் கலவையை நிரப்பவும்.

 ● இயந்திரத்தின் செயல்பாட்டு முறையைப் பொறுத்து (கைமுறை, அதிர்வு அல்லது ஹைட்ராலிக் அழுத்தம்), கலவையை அச்சுக்குள் நன்கு இறுக்கமாகவும். இது கற்களின் அடர்த்தி மற்றும் வலிமையை உறுதி செய்யும். 

 ● கற்கள் உருவாக்கி, அச்சில் இருந்து வெளியேற்றப்படும்.

4.4 பக்குவப்படுத்துதல் / காயவைத்தல் (Curing):

 ● தயாரிக்கப்பட்ட கற்களை சமதள பரப்பில், நேரடியாக சூரிய ஒளி படாத, நல்ல காற்றோட்டமான இடத்தில் அடுக்கி வைக்கவும்.

 ● கற்கள் காய்ந்ததும், அவை கான்கிரீட் ஆக மாறும் செயல்முறையை "பக்குவப்படுத்துதல்" (Curing) என்பர். இது கற்களுக்கு அதிக வலிமையை கொடுக்கும்.

 4.5 முக்கியமான படி:

 ● தயாரிக்கப்பட்ட கற்கள் 24 மணி நேரம் முதல் 7-14 நாட்கள் வரை, தினமும் குறைந்தது 3 முதல் 4 முறை தண்ணீர் ஊற்றி பக்குவப்படுத்த வேண்டும். கற்கள் காய்ந்து விடாமல் பார்த்து கொள்ள வேண்டும்.

 ● சிலர் பிளாஸ்டிக் ஷீட்டுகளைக் கொண்டு கற்களை மூடி வைப்பார்கள். இது ஈரப்பதத்தைத் தக்கவைத்து, பக்குவப்படுத்தும் செயல்முறையை மேம்படுத்தும்.

 4.6 சேமிப்பு மற்றும் விற்பனை (Storage & Sales):

 ● பக்குவப்படுத்தப்பட்ட கற்கள் முழுமையாக காய்ந்து, குறிப்பிட்ட வலிமையை அடைந்தவுடன், அவை விற்பனைக்கு தயாராகின்றன.

 ● கற்களை பாதுகாப்பாக, தரையில் இருந்து உயர்த்தி, ஒழுங்காக அடுக்கவும்.

➎. விற்பனை உத்திகள் (Marketing & Sales):

 ● கட்டுமான ஒப்பந்ததாரர்கள் (Building Contractors): இவர்கள் உங்கள் முக்கிய வாடிகையாளர்கள். அவர்களை நேரடியாகச் சந்தித்து, உங்கள் கற்களின் தரம் மற்றும் விலையைப் பற்றி பேசுங்கள்.

 ● கட்டுமான பொருட்கள் கடைகள் (Building material shops): இவர்களுடன் இணைந்து உங்கள் கற்களை  சந்தைப்படுத்தலாம்.

 ● ரியல் எஸ்டேட் நிறுவனங்கள் (Real Estate Developers): புதிய திட்டங்களுக்கு ஹாலோபிளாக் தேவையை இவர்கள் கொண்டிருப்பர்.

 ● பொது மக்கள் (General Public): வீடு கட்டும் தனிநபர்களுக்கு நேரடியாக விற்பனை செய்யலாம்.

 ● விளம்பரம் (Advertising): உள்ளூர் செய்தித்தாள்கள், சமூக ஊடகங்கள், சுவர் விளம்பரங்கள் மூலம் விளம்பரம் செய்யலாம்.

 ● சரியான விலை நிர்ணயம் (Competitive Pricing): சந்தை விலையை அறிந்து, அதற்கேற்ப உங்கள் விலையை நிர்ணயிக்கவும்.

➏. அரசு அனுமதி (Government Permissions):

     ஆம், எந்த ஒரு தொழில் தொடங்குவதற்கும் அரசு அனுமதி பெறுவது அவசியம். ஹாலோபிளாக் கற்கள் தயாரிப்பு தொழிலுக்கு பொதுவாக தேவைப்படும்.

 ●கிராம பஞ்சாயத்து / நகராட்சி / மாநகராட்சி - வியாபார (Trade License) உரிமம் பெற வேண்டும்.

 ● சிறு தொழில்களுக்கான பதிவு (MSME - Micro, Small and Medium Enterprises) - உத்யோக் ஆதார் பதிவு செய்வது நல்லது. இது பல அரசு சலுகைகள் மற்றும் திட்டங்களை பெற உதவும்.

 ● நீர் பயன்பாடு மற்றும் கழிவு நீர் வெளியேற்றம் தொடர்பாக உள்ளூர் சுற்றுச்சூழல் வாரியத்தின் வழிகாட்டுதல்களைப் பின்பற்ற வேண்டும். (எ.கா: தமிழ்நாடு மாசு கட்டுப்பாட்டு வாரியம் - TNPCB). தேவைப்பட்டால், மாசு கட்டுப்பாட்டு வாரியத்தின் அனுமதி (Consent to Operate) பெற வேண்டும். சிறிய அளவில் தொடங்கும் போது இது கட்டாயமில்லை.

 ● உங்கள் ஆண்டு வருமானம் GST சட்டம் நிர்ணயித்த வரம்பைத் தாண்டும் போது, GST பதிவு பெறுவது கட்டாயமாகும். ஆரம்பத்திலேயே பதிவு செய்து கொள்வது நல்லது. ஏனெனில் நீங்கள் கொள்முதல் செய்யும் பொருட்களுக்கான உள்ளீட்டு வரி கடன் (Input Tex Credit) பெற முடியும்.

 ● தொழில்முறை மின் இணைப்புக்கு (Industrial Electricity Connection) விண்ணப்பிக்க வேண்டும்.

 ● நீங்கள் ஊழியர்களை நியமித்தால், தொழிலாளர் நலச் சட்டங்களின் படி (எ.கா: Minimum wages Act, Employee's Provident Fund (EPF), Employees' State Insurance (ESI)) பதிவு செய்து, விதிகளை பின்பற்ற வேண்டும்.

➐. முக்கிய குறிப்புகள்

 ● சந்தை ஆய்வு (Market Research): உங்கள் பகுதியில் ஹாலோபிளாக் கற்களுக்கான தேவை, போட்டியாளர்கள், மற்றும் அவர்களின் விலைகள் குறித்து ஒரு விரிவான சந்தை ஆய்வு செய்வது அவசியம்.

 ● நிதி மேலாண்மை (Financial Management): ஆரம்ப முதலீடு, உற்பத்தி செலவுகள், விற்பனை வருமானம் ஆகியவற்றை திட்டமிட வேண்டும். சிறு தொழில் கடன் திட்டங்கள் குறித்து வங்கிகளை அணுகலாம்.

 ● தரம் (Quality): கற்களின் தரம் மிக முக்கியம். சரியான மூலப்பொருட்கள் மற்றும் விகிதங்களை பயன்படுத்தி, பக்குவப்படுத்தும் முறையை சரியாகப் பின்பற்றினால் மட்டுமே தரமான கற்களை உருவாக்க முடியும்.

 ● பயிற்சி (Training): இயந்திரங்களை இயக்குவதற்கும், சரியான கலவை விகிதங்களைத் தீர்மானிப்பதற்கும், கற்களின் தரத்தைக் கண்டறிவதற்கும் பயிற்சி பெறுவது நல்லது. 

 ➑. முதலீடு மற்றும் தேவையானவை (Investment) 

 இந்தத் தொழிலைத் தொடங்க இரண்டு வழிகள் உள்ளன: கைமுறை (Manual) அல்லது தானியங்கி (Automatic) இயந்திரங்கள். 

 ♦ இடம்: சுமார் 2,000 முதல் 5,000 சதுர அடி நிலம் தேவை (கற்களை உலர வைக்க அதிக இடம் அவசியம்). 

 ♦ இயந்திரங்கள்: கலவை இயந்திரம் (Mixer Machine) அச்சடிக்கும் இயந்திரம் (Hollow Block Making Machine) கை வண்டிகள் (Trolleys) 

 ♦ முதலீடு: சிறு அளவில் தொடங்க: ₹3 லட்சம் - ₹5 லட்சம். 

 ♦பெரிய அளவில் (Automatic): ₹10 லட்சம் - ₹20 லட்சம். 

 லாபம் (Profit Margin): ஒரு கல்லின் உற்பத்தி செலவு அதன் அளவு மற்றும் மூலப்பொருட்களின் விலையைப் பொறுத்தது. 

 ♦ உற்பத்தி செலவு: ஒரு கல்லிற்கு சுமார் ₹25 - ₹35 (சிமெண்ட், ஜல்லி, மணல்/M-Sand மற்றும் மின்சாரம் சேர்த்து).

 ♦ விற்பனை விலை: ₹45 - ₹60 வரை (இடத்தைப் பொறுத்து மாறுபடும்). 

 ♦ நிகர லாபம்: ஒரு கல்லிற்கு ₹5 முதல் ₹10 வரை லாபம் கிடைக்கும். தினமும் 500 கற்கள் தயாரித்து விற்றால், மாதத்திற்கு சுமார் ₹75,000 - ₹1,00,000 வரை லாபம் ஈட்ட முடியும். 

 ➒. அரசு கடன் மற்றும் மானியம் (Govt Loans & Subsidy) 

 புதிதாகத் தொழில் தொடங்குவோருக்கு தமிழக அரசு மற்றும் மத்திய அரசு பல்வேறு திட்டங்களை வழங்குகின்றன:

₹50 லட்சம் வரை கடன் பெறலாம். இதில் 15% முதல் 35% வரை மானியம் (Subsidy) கிடைக்கும்.

 ♦ UYEGP (தமிழக அரசு): வேலையில்லாத இளைஞர்களுக்கான திட்டம். ₹15 லட்சம் வரை கடன் பெறலாம். இதில் 25% மானியம் உண்டு. 

 ♦ NEEDS (தமிழக அரசு): பட்டதாரி இளைஞர்களுக்கான திட்டம். ₹10 லட்சம் முதல் ₹5 கோடி வரை கடன் பெறலாம். இதிலும் 25% மானியம் உண்டு. 

 ♦ குறிப்பு: மாவட்ட தொழில் மையம் (DIC) அலுவலகத்தை அணுகினால் இதற்கான விண்ணப்ப முறைகளைத் தெரிந்துகொள்ளலாம். 

 ➓. அடிக்கடி கேட்கப்படும் கேள்விகள் (FAQs) 

 🅐: ஒரு சிமெண்ட் மூட்டைக்கு எத்தனை கற்கள் கிடைக்கும்?: கல்லின் அளவைப் பொறுத்து (8 இன்ச் அல்லது 6 இன்ச்), ஒரு மூட்டை சிமெண்டிற்கு சுமார் 30 முதல் 40 கற்கள் வரை தயாரிக்கலாம். 

 🅑: இதற்கான மூலப்பொருட்கள் யாவை?: சிமெண்ட், எம்-சாண்ட் (M-Sand), மற்றும் சிறு ஜல்லிகள் (6mm Baby Chips). 

 🅒: கற்களை எவ்வளவு நாட்கள் உலர வைக்க வேண்டும்?: கற்களைத் தயாரித்த பிறகு குறைந்தது 7 முதல் 14 நாட்கள் வரை தண்ணீர் விட்டு முறையாகப் பதப்படுத்த (Curing) வேண்டும். அப்போதுதான் கற்கள் பலமாக இருக்கும். 

 🅓: விற்பனை வாய்ப்பு எப்படி இருக்கும்?: உள்ளூர் கட்டிட மேஸ்திரிகள், சிவில் இன்ஜினியர்கள் மற்றும் ஹார்டுவேர் கடைகளுடன் ஒப்பந்தம் செய்து கொள்வதன் மூலம் சீரான விற்பனையை உறுதி செய்யலாம்.

 முடிவுரை:

ஹாலோபிளாக் கற்கள், சுற்றுச்சூழலுக்கு உகந்த ஒரு கட்டுமானத் தீர்வாகவும், கட்டுமானச் செலவைக் குறைபதற்க்கான ஒரு வழியாகவும் இருப்பதால், வரும் காலங்களில் இதன் தேவை மேலும் அதிகரிக்கும் என்பதில் சந்தேகமில்லை. 

  எனவே இந்தத் துறையில் நுழையும் தொழில் முனைவோர், தரத்தில் கவனம் செலுத்தி, புதுமையான சந்தைபடுத்துதல் அணுகுமுறைகளுடன் செயல்பட்டால், கட்டுமானத் துறையில் ஒரு குறிப்பிடத்தக்க அடையாளத்தை உருவாக்க முடியும்.

  இந்த தொகுப்பு "ஹாலோபிளாக் கற்கள்" தயாரிப்புத் தொழிலைத் தொடங்குவதற்கு உங்களுக்கு உதவும் என்று நம்புகிறேன். வெற்றிகரமான தொழிலுக்கு வாழ்த்துக்கள்!